Nubain gitago sa kinatawo
CEBU, Philippines – Nasakpan ang usa ka bisita sa Cebu Provincial Detention and Rehabilitation (CPDRC) nga nagdala og unom ka ampoule sa nubain nga gitago sa iyang kinatawo niadtong Sabado.
Matud ni CPDRC Warden Romeo Manansala nga gitago ni Christian Casinillo ang nubain luyo sa iyang itlog ug nasakpan atol sa inspeksiyon dihang may nihagtik. Si Casinillo buot unta nga mobisita sa iyang higala nga si Danny Lopez. Sa wala pa nasakpi si Casinillo, sila si Resty Arsenal, 21, ug Jovelyn Daclan, 32, ang unang nadakpan sa kapolisan nga nagdala og unom ka ampoule sa nubain nga gisulod sa bucket nga puno sa ice.
“Kung nagka-wise na ang mag-transport sa drugs, nagka-wise man sad mi,” matud ni Manansala.
Kasamtangang anaa sa kustodiya sa CPDRC si Casinillo ug posibleng pasakaan og kasong Transportation of Illegal Drugs.
Samtang usa ka Reynaldo Geraldizo Jumao-as, 25, ang nasikop sa sitio Lawis, barangay Pasil, dakbayan sa Sugbo niadtong Domingo sa buntag kinsa nakuhaan og 29 ka pakete sa gituohang shabu, usa ka gamay nga karton nga kolor puwa ug kwarta nga nagkantidad og P950.
Ang pareho og apelyedo sa suspek nga usa ka Edgar Jumao-as, 38-anyos, minyo, ang nasikop usab sa kapolisan sa buy-bust operation sa sitio Candabong, barangay Binlod, Argao niadtong Sabado sa kadlawon.
Nasakmit gikan sa suspek ang pito ka pakete sa gituohang shabu. - Liv G. Campo ug USJ-R Masscom Interns Rosamin D. Lincaro, Lorelyn D. Dechos, ug Sharmaine Kaye F. Obra /GMR) (BANAT NEWS)
- Latest
