Kahayupan proteksiyonan batok tugnaw

CEBU, Philippines -  Nipahimangno ang Provincial Veterinary Office (PVO) sa mga mag-uuma sa pagbutang og temporaryo nga kapasilongan sa ilang kahayupan panahon sa ting-tugnaw. Si Dr. Louie Maestrado, hepe sa PVO Animal Health Division, nagkanayon nga ang nahitabong “cold spell” sa lungsod sa Balamban nagsilbi’ng leksiyon diin 43 ka baka, 11 ka kanding, duha ka kabayo ug duha ka kabaw ang namatay sa 11 ka barangay.

Matud sa PVO nga dunay mga hinungdan sa kamatayon sa hayopan panahon sa ting-tugnaw.

Ang tugnaw nga panahon makagama kini og mga komplikasyon nga moresulta sa kamatayon kung ang hayupan duna kini gihambin nga skin diseases, infections, stress ug malnourished.

Ang Municipal Agriculturist sa Balamban nga si Felogyn Sundo nagkanayon nga nag-andam na sila og vitamins ug electrolytes alang sa pag-boost sa immune system sa mga hayupan kung ugaling moigo na sab ang tumang katugnaw sa lugar.

Matud ni Sundo nga duna na sila’y gisangonan sa pagsusi sa insurance coverage sa farm animal sa lungsod.

Ubos sa Philippine Crop Insurance Corporation (PCIC), kung expire na ang insurance coverage ang insured gi-require nga mo- renew sa insurance contract.  (BANAT NEWS)