Tulo angol sa tigbas, dunggab, pusil

CEBU, Philippines -  Angol ang usa ka lalaki human gitigbas og sanggot sa iyang gikauban og duwa og hantak sa balay sa ilang silingan sa barangay Basak, Badian.

Ang biktima naila nga si Mario Bornea, 21, samtang ang suspek naila nga si Cirilo Suerte, 41, silingan ra sa biktima.

Samad sa liog ug nawong ang naangkon sa biktima kinsa dali’ng gidala sa tambalanan samtang nisibat ang suspek.

Samtang nalandig sa tambalanan ang usa ka lalaki human gidunggab sa paryente sa iyang kanhi kapuyo sa sitio Ubca 3, Quiot, siyudad sa Sugbo niadtong Huwebes sa gabii.

Ang gidunggab mao si Jemuel Macaling Bauri, 23, taga Cabreros, Basak-San Nicolas, samtang ang suspek giila nga si Jordan Estanio, taga barangay Quiot.

Ang biktima nibisita sa balay sa iyang kanhi kapuyo nga si Riza Campaña aron kuhaon ang ilang 2-anyos nga anak alang sa routine custody apan kusganong nipugong ang inahan sa babaye nga si Juliet Campaña nga niresulta sa panaglalis hangtud nisangko sa tumang kapungot sa suspek ug gidunggab ang biktima.

Ang biktima nakaangkon og samad sa ulo ug wala’ng bukton ug daling gidala sa tambalanan samtang ang suspek naka-eskapo.

Sa laing bahin, grabeng naangol ang usa ka tawo nga biktima sa pagpamusil sa iyang bayaw sa barangay Tabok, dakbayan sa Mandaue alas 10 pasado ang takna sa niaging gabii.

Si PO3 Arvin Palompon sa Presinto 3 sa Mandaue City Police Office (MCPO) niila sa biktima nga si Dorotheo Arevalo, 39, kinsa nakabaton og samad pinusilan sa iyang tiyan.

Ang biktima kuyog sa iyang bayaw gikan  nitambong og Christmas party sa barangay Paknaan sa maong dakbayan.

Sa ilang pagpamauli, kalit lang nga gikalalis ang iyang bayaw nga giila lang sa mga sakop sa pamilya nga usa ka Danny.(Bryner L. Diaz, Romeo T. Limpangog ug USJ-R Masscom Intern Sharmaine Kaye F. Obra/GMR)   (BANAT NEWS)