Mandaue CH workers ‘dugangan og P20 mil ang Christmas bonus

CEBU, Philippines - Makadawat pa unya og dugang P20 mil nga bonus ang  mga regular nga kawani sa kagamhanan sa dakbayan sa Mandaue gawas pa sa P10 mil nga bonus nga gikatakda nang ihatag kanila karong buwana. Ang tinguha nga pagdugang og P20 mil  natigayon pinaagi sa gipangamahanan nga resolusyon ni Konsehal Diosdado Suico, chairman sa committee on budget.

Ang konseho pinaagi sa maong resolusyon miawhag sa executive department’s local finance committee nga gipangulohan ni City Treasurer Regal Oliva sa pagpangita og pundo nga magamit sa paghatag og dugang bonus sa mga kawani.

Niadtong Disyembre 2 niining tuiga, ang Department of Budget and Management  mipagawas og memorandum bahin sa paghatag og Performance Enhancement Incentives (PEI) sa mga kawani sa gobiyerno. Matud pa ni Oliva nga nagkinahanglan sila og P14 milyones nga salapi alang sa dugang bonus. Gipasabot hinuon ni Oliva nga dili malakip sa makadawat og PEI ang dili regular nga mga kawani  subay sa rekisitos sa Commission on Audit.

Ang mga job-order nga naglakip sa Clean and Green ug Barangay Health Nutrition Worker sa dakbayan ang nakadawat usab sila og  P5,000 nga calamity assistance. (Romeo T. Limpangog/EIM)(BANAT NEWS)