Teddy O suporta sa HB 1516

CEBU, Philippines - Gisuportahan ni Bokal Thadeo Ouano ang tinguha nga pagpausbaw sa PhilHealth coverage alang sa mga nagbaton og Chronic Kidney ug dialysis treatment.

Matud ni Ouano nga dili paigo ang 45 ka adlaw nga coverage sa maong matang sa mga pasyente hinungdan nga nagkinahanglan gyud ang pagpausbaw ngadto na sa 90 ka adlaw.

Ang House Resolution 1516 nga gipangamahanan ni Kongresista Leopoldo Bataoil kun hingpit nga kaaprobahan makahatag kini og dugang kalig-on sa hangyo sa mga sakop sa PhilHealth  sa pagdugang sa coverage dialysis session sa mga pasyente nga nanginahanglan niini.

"This will help Chronic Kidney Disease (CKD) patients undergoing dialysis treatment particularly those who cannot afford to pay and to those who have come to seek for my assistance in the Province of Cebu," matud ni Ouano sa giduso nga resolusyon sa hunta probinsiyal.

Sa kasamtangan ang PhilHealth naghatag lang og 45 ka adlaw nga treatment coverage sa matag tuig alang sa dialysis patient-member.

Ang naandan nga ang CKD patient maoy ilang gikinahahanglan ang 104 ka sessions sa matag tuig o 156 alang sa mga pasyente nga nagbaton og kidney failure alang sa paghingpit sa ilang kaayuhan. (BANAT NEWS)