Nahitabo sa NBP di mahitabo sa Visayas-BJMP
CEBU, Philippines – Dili mahitabo sa Central Visayas ang nahitabo sa National Bilibid Prison ubos sa Bureau of Corrections sa kaulohan nga nadiskubrehan nga dunay mga kubol-kubol nga may mga mahalong gamit, milyones nga kwarta, drugas ug uban pang kontrabando sulod sa prisohan sa miaging adlaw.
Gipasalig ni Chief Superintendent Serafin Barreto, ang Regional Director sa Bureau of Jail Management and Penology 7 nga maglisod ang mga piniriso dinhi paghimo niini tungod kay gamay ra kaayo ang mga selda sa mga pasilidad niini dinhi.
Matud niya, aktibo usab ang BJMP sa pagpahigayon kanunay og operation greyhounds katulo sa usa ka semana.
Sa Cebu Provincial Detention and Rehabilitation Center (CPDRC) nga gidumala sa Kapitolyo ning bag-ohay lang, dunay dul-an 300 ka cellphones ug electronic gadgets nga nasakmit ug gitahan sa mga priso.
Samtang si Cebu City Vice Mayor Edgardo Labella miawhag usab kang Cebu City Jail Warden Johnson Calub nga pahugtan ang inspeksyon sa prisohan ilabi na karong Holiday seasons.
Atol sa meeting kagahapon sa Police Coordinating and Advisory Council, gipasaligan ni Calub ang PCAC nga di mahitabo sa CCJ ang nahitabo sa CPDRC.
Si Labella miingon karong Pasko ug sa Bag-ong Tuig tugotan nila ang mas taas nga visiting hours sa mga banay sa mga priso aron sila malipay.
Apan kinahanglang doblehon sa jailguards ang ilang inspeksyon sa dili pa mosulod sa prisohan ug sa mga selda sab sa mga piniriso. – /EIM) (BANAT NEWS)
- Latest
