Drugas nga nasakpan sa pantalan gisubay
CEBU, Philippines – Gipaubos na sa tactical interrogation sa Regional Intelligence Division (RID) sa Police Regional Office-7 ang drug courier nga nasikop niadtong adlaw’ng Biyernes.
Matud ni Sr. Supt. Paul Labra, hepe sa RID-7, nga nakig-alayon na sila sa Port Police aron ilang maestorya ang suspek nga si Criston Artiaga, 26, nga nasikop human nakuha sa x-ray machine ang drugas nga gisulod ug paper bag.
Halos P6 milyones ang kantidad sa maong drugas nga nitimbang og 500 gramos nga dad-on unta paingon sa Talibon, Bohol. “Atong gitinguha mahibaw-an nato and ma-confirm ang source sa shabu sa Bohol. If naggikan ba gyud dinhi and kinsa gyud. This will really prove na ang kasagarang source sa shabu diri sa Cebu,” matud ni Labra.
Gusto sab masayran ni Labra kung kapila na nakapalusot og drugas paingon sa Bohol ang suspek.
Gipasabot ni Labra nga usa lang ka courier si Artiaga nga igo lang bayran kung makahatud sa supply ngadto sa lugar nga ilang adtoan.
“Di na mao ang mamaligya gyud. Ang mga couriers maghatud lang ug bayran based on grams,” dugang ni Labra.
Gitug-an sa opisyal nga duna na sila’y inisyal nga pangan sa mga drug personalities nga responsabli sa maong kalihukan apan kini ila lang makompirmar kung ila na nga ma-estorya ang dinakpan.
Si Labra miingon nga nagpaabot pa siya sa iyang mga sakop nga nagpahigayun sa imbestigasyon.
Giangkon ni Labra nga bisan sa ilang kampanya batok ilegal nga drugas makakita gihapon og paagi ang mga druglords sa pagpalusot sa mga drugas.
Gibantayan karon sa RID-7 ang mga pantalan sa dakbayan ug probinsiya sa Sugbo nga nagsilbing lutsanan sa mga drug couriers lakip na sa Argao, Samboan, Minglanilla ug uban pa. – /GMR) (BANAT NEWS)
- Latest
