Gidili pagbaligya og pabuto sa Mandaue

CEBU, Philippines - Ang  buhatan sa Bureau of Fire Protection (BFP) sa dakbayan sa Mandaue wala’y giila nga firecracker zone area nga maoy hinungdan nga higpit gayud nga gidili sa tanang dapit sa dakbayan ang pagpamaligya og pabuto niining panahon sa pagsaulog sa Pasko ug Bag-ong Tuig.

Nunot usab sa ilang pagpasiugda og Oplan Paalaala nga magsugod sa Disyembre 16, ang kabomberuhan mulibot sa 27 ka barangay sa dakbayan aron sa pagpahinumdom nga likayan ang pagpabuto sa pagsaulog sa Pasko ug Bag-ong Tuig.

Laing pahimangno sa kabomberuhan mao ang dili paggamit og mga baratuhon nga Christmas light, ceiling fan ug uban pa aron kalikayan ang sunog.

Si SFO3 Roy Garcia nga maoy deputy fire marshall for operation ug chief investigator mipasabot nga ang wala pag-ila og dapit sa dakbayan isip firecracker zone area nagpasabot nga wala sila’y gihatagan og permit sa pagpamaligya’g pabuto sa Mandaue.

Matud ni Garcia nga ilegal ang pagpamaligya og pabuto sa dakbayan sa Mandaue maoy hinungdan nga kun adunay masakpan nga mamaligya’g pabuto mahimo kini nga sakmiton ang produkto ug ang hingtungdan dakpon.

Giklaro ni Garcia nga ang kabomberuhan sa dakbayan naghatag hinuon og permit sa namaligya og pyrotechnics apan kadto ra’ng anaa sa gawas sa Parkmall sa North Reclamation Area, sa J Center Mall sa dalan A.S. Fortuna sa Barangay Bakilid ug sa Insular Square Mall sa Barangay Tabok.

Si Garcia miingon nga ang mga pyrotechnics mao kadto’ng mga pabuto nga molupad ngadto sa kawanangan apan ang gihugtan g’yud nga gidili mao kadtong mga rebentador nga naglakip sa bawang, Judas Belt, Triangle, Super Lolo ug uban pa.

Si SFO3 Garcia miingon nga sugod ugma sugdan nila ang pagsuroy sa tibuok dapit sa dakbayan aron pag-awhag sa katawhan nga maglikay sa pagpabuto aron kalikayan ang kadaut ug trahedya sa pasko. (BANAT NEWS)