Pito nadakpan sa drugas
CEBU, Philippines - Dul-an P100 mil nga kantidad sa drugas ang nasakmit ug pito ka tawo ang nadakpan apil ang mabdos sa mga sakop sa City Intelligence Branch (CIB) sa Cebu City Police Office (CCPO) atol sa duha ka managlahing drug raid sa siyudad.
Ang mga nadakpan mao sila Juven Suralta,30, Rosa Esguerra, 61, Arthuro Dimaano, Cefirino Alvarado, Gerald Papasin ug Mark Jomarico diha sa usa ka drug den sa Sitio Estacionan, Mabolo.
Sumala pa ni Insp. Gomersendo Mandawe ang deputy chief sa CIB nga nahinabi sa Banat News nga una nilang gironda ang usa ka balay ni Suralta nga giingong gihimong suyopanan.
Apan atol sa pagsulod sa kapolisan apil sa ilang nasikop ang lola nga si Esguerra, 61, nga nakuhaan og 45 ka gagmay’ng pakete ug usa ka medium size nga paketeng pulos dunay sud nga gituohang shabu.
Sumala pa ni Mandawe nga mitug-an si Esguerra nga namorsiyento ra siya sa drugas nga gipasa ra kaniya. “Namorsiyento ra daw siya, pero sa nahibaw-an namo apil pud ni siya sa pagbaligya diha,” matud pa ni Mandawe.
Naabtan diha sa drug den sila si Dimaano, Alvarado, Papasin ug Jomarico nga matud pang Mandawe dihang nakasulod na sila igo lang mitutok kanila ug mipadayon sa pagsuyop.
Duha ka oras ang milabay, usa sa ka Rechel Lañas,22, nga usa ka mabdos, ang nasikop sa CIB sa Villagonzalo 2, Barangay Tejero kansang bana nadakpan usab sa CIB sa pipila ka semana na ang nilabay tungod sa drugas. Nasayran nga manganakay na si Lañas apan giingong maoy mipuli sa pamaligya og drugas sa iyang bana nga nadakpan.
Nakuha sa kapulisan kang Lañas ang usa ka dako nga putos, duha ka medium ug 12 ka gagmay nga pakete nga pulos dunay sud nga gituohang shabu. (BANAT NEWS)
- Latest
