Karaang bomba nakubkoban
CEBU, Philippines - Nakubkoban sa giugmad nga subdivision didto sa Sitio Sunshine, Barangay Lataban, Liloan ang usa ka vintage bomb nga gituohan sa kapolisan nga nalubong kini sa maong lugar panahon pa sa 2nd World War.
Si SPO3 Octavio dela Paz miingon nga alas 9 sa buntag niadtong Biyernes nakubkoban sa nagkawot nga mga trabahante ang bomba nga maoy nakaingon sa paghunong sa ilang trabaho.
Nakurat sila dihang adunay puthaw nga mihagtok sa ilawom sa yuta sa ilang pagkawot ug ilang nasuta nga usa diay ka vintage bomb.
Ang foreman sa mga trabahador dali nga mipahibalo sa barangay kapitan kinsa dali usab nga mipadangat sa kasayuran ngadto sa kapolisan.
Dugang pa ni Dela Paz nga nagtuo sila nga ang maong bomba nga nakubkoban sa mga trabahante aduna pa kini kapasidad sa pagbusikad maoy hinungdan nga mainampingon kaayo sa ilang pagkuha ug gidala kini sa police station.
Si SPO3 Dela Paz miingon nga ilang gipahiluna sa usa ka luwas nga lugar ang maong vintage bomb nga nakubkoban ug sa Lunes sa buntag ilang gikatakda nga kini ihatud sa Cebu Provincial Police Office (CPPO).
Ang lagda mao nga kun adunay makit-an nga mga eksplosibo adto kini itugyan sa Explosives Ordnance Disposal Team (EODT) sa AFP Central Command kang kansang mga sakop adunay katakus ug kahibalo unsaon kini nga dili makahatag og peligro. (BANAT NEWS)
- Latest
