P2M shabu nasakmit

CEBU, Philippines - Gibanabanang mokabat  P2 milyones nga gituohang shabu ang nasakmit sa mga sakop sa Port Police gikan sa usa ka gidudahang drug courier diha sa Pier 1 sa dakbayan sa Sugbo samtang kini padung sa Bohol.

Ang nasikop mao si Lean Criston Artiaga, 26,  nga  padung unta sa Talibon via Tubigon.

Si Inspector Joffery Rossel, sa Port Police, miingon nga ang maong suspek didto nasikop niya sa may x-ray scanner sa departure area sa maong pantalan. Sumala pa ni Rossel nga ang operator sa x-ray machine daan nang nakabantay nga daw wala mahimutang ang suspek pagkakita sa x-ray machine.

Matud pa nga gibutang ni Artiaga ang uban niyang mga gamit apan gibitbit lang niya ang paper bag nga dunay sud nga pinutos nga hopia sa iyang pagsulod hinungdan nga gisitar kini sa machine operator.

Si Artiaga gikatahong mibalik sa agi hinungdan nga mitug-an ang operator  kang Rossel kinsa maoy nakig-estorya kang Artiaga. Matud pa nga gipangutana kini pag-usab kun modayon ba kini og larga ngadto sa Bohol.

Dihang mitubag kini nga buot g’yud kining makalarga, giingnan siya nga kinahanglang moagi ang iyang paper bag sa x-ray machine, kay kun dili, i-deny entry siya sa Port Police ug di na siya makalarga ngadto sa Bohol.

Tuod man, misugot kini sa awhag ni Rossel ug mibutang sa iyang dalang paper bag apan didto nasakpan nga dunay sud nga shabu nga gisagol sa mga hopia ug mga pan hinungdan nga kini gisikop.

Matud pa nga gibutang sa suspek ang maong drugas sa hopia kay parehas ra man kini og porma pagkaputos.

Ang suspek nga nahinabi sa mga tigbalita miingon nga wala siyay kalibotan nga dunay drugas nga nakuha kaniya apan wala na mohatag pa og dugang pamahayag bahin sa iyang pagkasikop.

Pasakaan karong adlawa og kasong kalapasan sa Comprehensive Dangerous Drugs Act of 2002 ang suspek.

Si Rossel nagkanayon nga sa iyang pagbanabana, di momenus P2 milyones ang kantidad sa maong shabu nga mitimbang og lapas 500 ka gramos.

Apan kun basehan ang presyo niini sa Dangerous Drugs Board, mokabat og P6 milyones ang abton sa maong gidaghanon sa shabu.

Sa laing bahin,  nadakpan sa buy-bust operation ang magtiayong Edmund Alsado Pasco, 28, ug asawa niini nga si Jenny Sugarol Pasco, 28,  diha sa Barangay  Tayud, sa Liloan.

Si Senior Police Officer 3 Octavio dela Paz sa Liloan Police Station miingon nga ang ilang target sa buy-bust operation mao si Edmund apan giapil nila og sikop ang asawa tungod kay nag-uban ang duha atol sa transaksyon.

Nasakmit gikan sa duha ang duha ka paketeng shabu ug duha ka dagkong putos niini ug ang P500 nga marked money, usa ka cellphone ug P1, 400 nga salapi nga gituohan halin sa pagpamaliya og shabu.  (BANAT NEWS)