Sinkhole nagkadako og maayo— MGB official

CEBU, Philippines - Ang Mines and Geosciences Bureau-Central Visayas miawhag sa mga manguryuso nga dili magpalabi sa pagpaduol sa sinkhole sa Barangay Banhigan, Badian kay mao kini ang nakita nga hinungdan sa sige niini og kadako.

Matud ni MGB Senior Geologist, Josephine Aleta padayun sa pag-aktibo ang sinkhole tungod sa padayong pagdagsa sa mga tawo nga buot lang manguryuso. “Naa pay cracks nearby unya duna gyud ni possibility nga mudako because of additional weight nga maka-disturb sa ground kay daghan lagi magsige og tan-aw,” matud ni Aleta. Siya midugang nga ang maong sinkhole resulta sa pagsige og uwan tungod sa bagyong Queenie pipila ka semana na ang nakalabay.

“Dunay possibility that there could be a water system and aside from that a formation of a cave underneath is also a possibility,” matud niya.

Ang lungsod abunda kini sa yuta nga marl, nga kombinasyon sa limestone ug clay, ug water soluble.

Hangtud karon, ang MGB mohimo pa og ground-penetrating radar survey sa maong dapit tungod kay wala pa mo-request ang munisipyo.

Sa pagkakaron ang sinkhole anaa na sa 15-metros ang gilapdon ug unom na ka metros ang gilawmon matud ni Dr. Eddie Llamedo, tigpamaba sa Department of Environment and Natural Resources (DENR)-7. (Ria Mae Y. Booc/EIM)(BANAT NEWS)