Nanigbakay, gipusil patay

CEBU, Philippines - Patay ang usa ka lalaki nga gipusil  samtang nagtan-aw sa tigbakayan sa barangay Cambanay, dakbayan sa Danao.

Ang namatay mao si Ronstil Lao Casas, 30, taga Barangay Dunggoan sa maong dakbayan kinsa nakabaton og daghang samad sa iyang bukobuko nga milapos sa dughan ug tiyan nga nakaingon sa hinanali niining kamatayon.

Si Police Officer 2  Ronald Gomez sa Danao City Police Station miingon nga nagkatibulaag ang mga tawong nagtan-aw sa tigbakay apan misabay kanila ang gunman sa pag-ikyas.

Sa pagkakaron, wala pay matumbok ang kapolisan kun si kinsa ang mipusil sa biktima ug kun unsay motibo niini.

Kini tungod kay pulos na nangambot ang mga tawong ilang naduolan.  (Romeo T. Limpangog/EIM)(BANAT NEWS)