Gwapang nangilad gikiha

CEBU, Philippines - Gipasakaan og kaso kagahapon sa hapon ang usa ka babayeng giingong menor de edad human gipasanginlang wala mobayad sa P15 mil nga pag-estar niini sa usa ka beach resort sa Asturias.

Ang hepe sa Asturias Police Station nga si Inspector Philip John Libres mibutyag nga kasong estafa ang ilang gipasaka batok sa maong babaye nga taga Southern Leyte, subay sa reklamo sa tag-iya sa beach resort.

Matud pa ni Libre nga nakahinabi sa Banat News nga gipaubos dayon ang babaye sa inquest proceedings ug  wala kini  mo-file og counter affidavit. Ang piskalya mibutang og P40 mil nga piyansa alang sa iyang temporaryong kagawasan ug pagkahuman gimando nga ikostudiya kini pagbalik sa social welfare alang sa pagpadayon sa assessment sa “act of discernment and diversion” kun nasayod ba siya nga sayop ang iyang gihimo o dili. Unang nakontrobersiya ang maong babaye sa Mandaue City niadtong Agosto ning tuiga human mi-shoplift og balor P10 mil nga mga butang nga hangtud karon wala pa makompleto og bayad.

Nasundan kini dihang usa ka salon ang mireklamo tungod kay wala kini mobayad sa P2,680 nga balayrunon sa pagpagwapa niini, hinungdan nga kini gipasakaan og kaso. Kagahapon, gipasakaan og kaso sa beach resort owner nga Myrna Beltran nga girepresentahan ni Judelyn Cantabaco. Si Southern Leyte Board Member Daisy Gamale nga ig-agaw sa stepfather sa maong menor mikompirmar nga 16- anyos pa gyud kini. Matud niya  gipanganak kini niadtong Hulyo 31, 1998 sa Sogod, Southern Leyte diin maggikan ang iyang inahan. Iyaha usab giklaro nga dili adopted ang maong menor ug dili sila ig-unsa niini.

Matud ni Gamale, gipakaslan sa iyang ig-agaw ang inahan sa menor apan mibiya ang inahan ug nikuyog og langyaw ug gibiyaan  kanila ang menro nga nag-edad pa lang og 5-anyos. Samtang ang tinuod nga amahan sa menor giingong taga Cebu City apan wala na nila kini hibaw-i kun asa. Matud pa ni Gamale nga dili na gusto sa ilang pamilya nga tabangan ang maong menor aron maleksyon. “Di na siya dawaton. Enough na. Over na ni ang nahitabo,” matud sa board member. (Grace Melanie I. Lacamiento ug Mylen Manto sa The Freeman/EIM)(BANAT NEWS)