Nag-videoke gipusil patay
CEBU, Philippines - Wala na makatiwas og kanta ang 21-anyos nga lalaki human gipusil sa ulo sa iyang gikabikil sulod sa usa ka videokehan sa sitio Obayon, Baring, lungsod sa Carmen niadtong nakalabay nga gabii.
Ang biktima naila nga si Anjohn Bermejo, ulitawo nga nagpuyo sa maong lugar samtang ang suspek naila nga si Junver Bejoc, 20.
Matud ni PO3 Jerome Quimque, desk officer sa Carmen Police, nga samtang nagtagay ug nagkanta-kanta ang biktima kauban ang iyang mga higala pasado alas 11 sa gabii kalit lang niabot ang suspek dayun namusil.
Gibalik kay gusto pa unta tiwasan sa suspek ang nagbuy-od nga lawas ni Bermejo apan usa sa mga higala sa namatay nga si Roberto Cane ang milayog sa suspek ug nailog ang armas nga wala na nakabuto.
Ang suspek dali nga nisibat samtang nakuha sa crime scene ang tulo ka basiyo sa kalibre .45 nga pistol. (BANAT NEWS)
- Latest
