Naglingkod sa kapehan gidunggab

CEBU, Philippines - Gidunggab samtang naglingkod ang usa ka lalaki kauban sa iyang kapuyo duol sa coffee stand sa Lapu-Lapu City Public Market alas 6:30 niadtong Martes sa gabii. Si PO3 Luisito Ernie sa Lapu-Lapu City Police Office miila sa nanunggab nga si Ryan Berdin, 22-anyos, nagpuyo sa gihisgutang dapit samtang ang biktima mao si Clifford Sullano, 19-anyos, residente sa sitio Lucena, barangay Looc.

Giingong kalit niduol si Berdin sa duha ug gidunggab sa duha ka higayun si Sullano gamit ang hait nga hinagiban ug naigo kini sa likod nga bahin sa iyang lawas.

Gidala ang biktima sa tambalanan samtang nisibat ang suspek dihang niresponde ang kapolisan.

Nigawas sa inisyal nga imbestigasyon nga selos ang hinungdan sa pagpanunggab ni Berdin ug giingong gihulga sa suspek nga patyon niya si Sullano ug ang iyang kapuyo. (BANAT NEWS)