Ulo napisat gilatayan sa trak

CEBU, Philippines - Maayo’ng pagkapisat sa ulo sa lalaki nga nagbiseklita diha nga nalatayan kini sa ligid sa truck de-karga didto sa dalan Plaridel, Barangay Alang-Alang, dakbayan sa Mandaue kaniadto’ng Miyerkules sa gabii.

Hangtod kagahapon sa hapon ang biktima nagpabilin nga wala pa mailhi tungod kay napusa ang nawong ug walay dala nga mga papeles. Gibana-bana nga nagpanuigon kini og kapin sa 30-anyos, gamayon ang panglawas ug nagsul-ob og T-shirt nga puti ug nagpurol.

Si traffic investigator Eduardo Flores miingon nga ang truck de-karga (GXH 200) nga gimaneho ni Ruben Santillan, 33, taga Sitio Aroma, Barangay Subangdaku, Mandaue gikan kini sa dakbayan sa Sugbo.

Matud ni SPO3 Flores pag-abot sa truck sa eskena sa dalan Plaridel ug A.C. Cortes Avenue sa Barangay Alang-Alang ang nagsunod nga biseklita kalit lang mi-overtake.

Wala makamatikod ang drayber sa truck nga mi-overtake ang nagbisekleta mao nga diha’ng gipabulhot niini pagpadagan ang gimaneho nga truck napunggit ang maong tawo.

Ang tawo nalamba sa karsada uban sa iyang bisekleta ug dayon gilatayan sa ligid ang iyang ulo. Si SPO3 Flores miingon nga mitahan sa ilang buhatan ang drayber sa truck de-karga ug temporaryo nga gitanggong.  (BANAT NEWS)