Nanigarilyo, 21 ka tanod, polis gidakop

CEBU, Philippines – Mokabat sa 21 ka mga tanod ug polis ang nadakpan sa mga sakop sa City Environmental Sanitation Enforcement Team (CESET) sa panahon sa binakwitay sa bagyong Ruby tungod sa pagpanigarilyo sa mga publikong lugar.

Matud ni Grace Luardo, pangulo sa CESET, nga pito sa 21 ka nadakpan mga polis samtang 14 mga barangay tanod.

Gidugang ni Luardo nga wala sila nagkuwang sa pahimangno sa tanan mahitungod niini. Gani nagbutang sila og mga posters, nanghatag usab sila og mga leaflets mahitungod sa pagdili sa pagpanigarilyo sa mga publikong lugar.

Gikonsiderar nga publiko ang mga simbahan, jeepneys, tunghaan, sementeryo, City Hall, plaza ug uban pa’ng mga lugar nga na’ay daghang tawo.

Ang mga masakpan sa akto nga nanigarilyo hatagan og citation ticket ug makabayad og P1,500 apan mahimo sila’ng mopili kung mobayad ba sila og P1,500 o mohimo sila’g pito ngadto sa walo ka oras nga community service sama sa paglimpyo sa mga dalan.

“Ang panigarilyo sa publikong lugar like sa sigarilyo sa jeep, sa city hall ug sa mga simbahan, P1,500 gyud,” matud ni Luardo.

Gani giandam na sa buhatan ang mga warrant of arrest nga ilang ipanghatag sa mga tawo nga ilang nadakpan apan wala panumbalinga ang ilang mga responsibilidad nga bayranan.

Apil sa hatagan og citation ticket sa mga sakop sa CESET ang mga tindahan nga dili manglimpyo sa ilang mga tugkaran. Gani gi-warningan na sa CESET ang mga naninda gawas sa Abellana National High School tungod sa pagpasagad sa ilang mga hugaw.

“Atong gipangkuha ngalan sa school unya ato nga i-inform unya manglimpyo sa ilang mga tugkaran kay kung dili gani ato gyud ma-isyuhan og citation (ticket) bisa’g kinsa pa’y nagpalikod nila,” pahimangno ni Luardo.

Nakalatid sa City Ordinance 2441 nga si bisan kinsang madakpan nga manigarilyo sa publiko nga dili residente sa siyudad sa Sugbo mahimo gihapon nga makabayad tungod kay naa sila sulod sa hurisdiksyon sa dakbayan.

Gidili usab ang pagpamaligya og sigarilyo 100 metros gikan sa mga tunghaan ug mga lugar nga pirmeng adtoan sa mga menor de edad.

Gidugang nga ang mata’g establesemento kinahanglan nga magbutang og mga smoking area nga buwag sa laing parti sa edepisyo ug 10 metros gikan sa mga entrada ug gawasanan sa building. Kung dili, kinahanglan usab sirado ang maong smoking area apan aduna’y saktong ventilation. – /GMR) (BANAT NEWS)