Tindahan sa Bacayan gilungkab

CEBU, Philippines – Mokabat sa P60 mil ang nadala sa kawatan nga nilungkab sa usa ka establesemento sa may dalan Emerald, Bacayan, dakbayan sa Sugbo niadtong nakalabay nga adlaw. Ang Quick Serve Marketing nga gipanag-iya ni Paul Lopez, 55-anyos, ang nabiktima sa pagpanglungkab sa wala pa mailhi nga kawatan.

Matud ni PO1 Gringo Muldes, desk officer sa Talamban Police Station, nga sa ilang imbestigasyon nasuta nga giguba ang kisame sa kasilyas sa ikaduha nga andana ug didto niagi ang kawatan.

Pugsanon nga giabli ang kahoy nga hunos ug gikuha ang P60 mil.

Ang Crime Scene Investigation Unit may nakuha nga mga finger prints nga posibleng iya sa nanglungkab ug gamiton sa pag-ila sa responsabli sa krimen. – /GMR) (BANAT NEWS)