Upat ka pushers sa amihanan nasikop

CEBU, Philippines – Upat ka mga gidudahang tigpayuhot og ilegal nga drugas ang nasikop sa managlahing operasyon sa kapolisan sa amihanang bahin sa probinsiya sa Sugbo niadtong nakalabay nga adlaw.

Sa dakbayan sa Bogo nasikop sila si Andy Arnoco, 35, taga barangay San Vicente nga maoy target sa kapolisan ug si Wilhelm Presco Maluya Jr., 30, taga Bateria, Daanbantayan.

Human nakapalit og gituohang drugas ang asset sa kapolisan, dali nga gisulod sa mga awtoridad ang nahimutangan ni Arnoco pasado ala una sa kadlawon ug giapil og sikop si Maluya didto sa lugar ug nipalit og drugas.

Nakuha sa kapolisan gikan ni Arnoco ang lima ka gagmay nga pakete sa gituohang drugas lakip na ang buy-bust money samtang nakuha gikan ni Maluya ang duha ka gagmay nga pakete sa gituohang drugas.

Sa lungsod sa Borbon, sikop sab ang usa ka 19-anyos nga lalaki atol sa buy-bust operation sa barangay Don Gregorio Antiqua.

Ang dinakpan naila nga si Darwin Baba kinsa nakuhaan og  unom ka gagmay nga pakete sa drugas ug lakip sa buy-bust money nga duha ka gatos ka pesos.

Laing nadakpan nga nagdala og shabu mao si Herchile Estrapmon Bataluna, 38-anyos, taga dalan Juan Luna, Poblacion, dakbayan sa Danao alas 8 pasado ang takna sa niaging gabii.

Si PO2 Ronald Gomez miingon nga ang team nga gipanguluhan ni PO3 Fiel Restauro ang nagpatrolya sa maong dapit labot sa ilegal nga kalihukan sa maong lugar.

Ilang nasigpatan ang suspek nga nagdali sa pagpahilayo hinungdan nga ilang gisita ug girikisa ang kalawasan ug nakuha ang usa ka gamay nga paketeng shabu hinungdan sa pagkasikop. – /GMR) (BANAT NEWS)