Talisay manghatag ‘sab og bonus
CEBU, Philippines – Gihangyo ni Talisay City Mayor Johnny V. De los Reyes ang mga konsehal nga aprobahan ang iyang gisugyot nga Supplemental Budget No. 2 nga maglakip sa paghatag og Productivity Enhancement Incentives (PEI) ngadto sa mga kugihan nga kawani sa City Hall.
Ang P33 milyones nga dugang budget gipirmahan sa mayor nga “urgent” ug gusto niya nga dili unta langan-langanon sa pag-aprobar sa mga sakop sa City Council.
Mokabat lang hinuon og P5 milyones ang budget nga gisugyot sa mayor nga gastohon sa paghatag og cash incentives sa mga opisyal ug regular employees nga dalaygon ang serbisyo.
Matud ni City Administrator John Yre de los Reyes nga mangayo pa sila og opinion sa Commission on Audit kun pwede ba mahatagan og bonus ang mga Job Order personnel.
Ang Commission on Audit adunay pahimangno sa mga opisyal nga dili mohatag og cash gifts, year-end bonus ug productivity enhancement incentives ngadto sa mga job order personnel kay ang paghimo niini maisip nga illegal.
Sa laing bahin, si Majority Floor Leader Richard Francis Aznar miingon nga ilang paspasan ang budget deliberation aron maaprobahan ang gipangayo sa mayor nga Supplemental budget No. 2. – /RUB) (BANAT NEWS)
- Latest
