Mga tunghaan sa Lapu limpyo human sa Ruby

CEBU, Philippines – Ang buhatan sa Clean and Green sa dakbayan sa Lapu-Lapu wala’y nakita nga problema sa basura sa matag eskwelahan nga nagsilbing evacuation centers atol sa bagyong Ruby.

Si Mario Ymbong, opisyal sa Clean and Green Department, nagkanayon nga gimandoan na sila daan ni Mayor Paz Radaza ug gipaubos sila og seminar sa pagpanglimpyo sa maong      lugar.

Sa hulga sa bagyong Ruby, si Ymbong miingon nga nipasiugda sila sa pag-roving sa kadalanan ilabi na sa mga suok nga barangay.

Gipakatap ang 25 ka tawo sa pag-check up kung aduna ba’y mga sanga o mga punoan nga nangabali sa pag-agi sa bagyong Ruby apan wala’y kadaut nga nakita.

Dugang ni Ymbong nga dali’ng narespondehan ang mga mibara nga tubig sa drainage sa mga barangay pinaagi sa ilang water pump ug gi-dispose kini duol sa dagat.

Wala sa’y nakita nga hugaw sa isla sa Olango ingon man nga aduna sab sila’y tawo nga gi-assign sa pagpanglimpyo.

Mapasalamaton si Radaza sa kooperasyon ug preparasyon sa mga departamento sa pag-alerto sa bagyo ug ni-improve ang mga lihok kontra sa niaging bagyong Yolanda. – /GMR) (BANAT NEWS)