PUJ, tanker nagsungag, 10 angol

CEBU, Philippines – Naangol ang napulo ka tawo dihang ang gisakyan nga public utility jeepney (PUJ) nakigsungag sa water tanker ilawom sa Maguikay Flyover, dakbayan sa Mandaue alas 12 ang takna sa niaging tungang gabii.

Si PO2 Rolando Estordio, field investigator sa Mandaue City Police Office (MCPO), niila sa mga naangol nga sila si Lemuel Duan, 28, taga Panugnawan, Medellin nga maoy nagmaneho sa PUJ gikan sa lungsod sa Compostela; David Queen Ann Ingon, 32, taga Mabolo, dakbayan sa Sugbo; Jessa Mae Arneses, 22, taga Nasipit, Talamban; Rolando Rago, 25 ug asawa nga si Fe, 25, ug ilang 6-anyos nga anak nga si Joshua Rago, taga Pardo, dakbayan sa Sugbo.

Naangol usab ang kauban nilang pasahero nga sila si Junrey Agipo, 33, taga Tayud, Consolacion; John Cabada, 19, taga Lahug, dakbayan sa Sugbo; Jamelito Cueva, 30, taga Catarman, Liloan; ug Jovelyn Tabuco, 27, taga Pardo, dakbayan sa Sugbo.

Si Estordio miingon nga sa ubos sa flyover niagi ang PUJ nga gimaneho ni  Duan nga nisukwahi sa naandan nga agianan nga adto sa ibabaw.

Naatol sa pagsuong sa water tanker nga gimaneho  ni Rodrigo Andaya, 64, nga taga Bais, Negros Oriental gikan sa Maguikay paingon sa dakbayan sa Lapu-Lapu hinungdan sa panagsungag sa duha ka sakyanan.

Natikwang ang PUJ nga nakaingon sa pagkaangol sa napulo ka pasahero. Ang mga biktima gidala sa tambalanan samtang ang duha ka drayber nga sila si Duan ug Andaya ang temporaryong gitanggong sa detention cell sa kapolisan. – /GMR) (BANAT NEWS)