PNoy motambong sa ASEAN-ROK Summit

CEBU, Philippines – Gikatakdang mamulong si Presidente Benigno Aquino III didto  sa nasud sa South Korea alang sa Association of Southeast Asian Nations (ASEAN)-Republic of Korea 25th Anniversary Commemorative Summit nga himuon karong Disyembre 11 hangtud 12.

Si Aquino ug mga kaubang siyam ka mga lider sa ASEAN Member States pulos mamulong sa maong tigom mahitungod sa temang "Building Trust, Building Happiness," sumala pa sa report sa Philstar.com.

Ang nasud sa South Korea naninguhang mapalig-on ang relasyon niini sa ASEAN pinaagi sa pagsalig nga matud sa gipagawas nga pamahayag magbunga ngadto na sa kalipay.

Samtang ang presidente sa Korea nga si President Park Geun-hye mo- host og  Welcome Dinner and Cultural Performance sa mga kaubang ASEAN Leaders.

Gawas sa maong tigom, si Aquino ug Park motambong sa nagkadaiyang kalihokan sama sa exhibition sa Korean traditional arts ug crafts, mga special exhibition sa public governance.

Pakigkitaan usab ni Aquino ang chief executive officer sa Korea Aerospace Industries, ang kompanyang naghimo sa dose ka FA-50 Falcon fighter-trainer jets nga gipalit sa Pilipinas alang sa Philippine Air Force.

Ikauban ni Aquino sila si Foreign Affairs Secretary Albert del Rosario, ASEAN-Philippines Director-General Luis Cruz ug uban pang sakop sa kabinete ni Aquino. (Gikan sa Wires/EIM) (BANAT NEWS)