Lalaki gitigib sa tighimo’g gitara

CEBU, Philippines – Tighimo og gitara nanunggab sa iyang higala gamit ang tigib human sa panaglalis samtang nagtagay sa barangay Agus, dakbayan sa Lapu-Lapu  niadtong Domingo. Si Allan Magarang, 39-anyos, ang miluba sa iyang higala nga si Romeo Arong, 46-anyos, parehong nagpuyo sa maong lugar.

Matud ni PO3 Luisito Ernie sa Lapu-Lapu City Police Office- Homicide Section nga si Arong nakaangkon og samad dinunggaban sa tuo nga braso.

Daling gidala sa Lapu-Lapu City District Hospital ug gibalhin sa Vicente Sotto Memorial Medical Center si Arong samtang nitahan sa mga barangay tanod si Magarang kinsa kasamtangang gibutang sa detention cell ug nagpaabot nga pasakaan og kasong attempted homicide. – /GMR) (BANAT NEWS)