Pizza hinungdan sa dunggab

CEBU, Philippines - Tungod lang sa pizza nalandig sa tambalanan ang 45-anyos nga lalaki human gidunggab sa iya ra sab kauban sa trabaho sa barko nga gikalalis gumikan sa karton sa pizza nga wala na’y sulod nga gibutang sa lamesa.

Ang insidente nahitabo sa Sitio Tawagan, Tayud, Consolacion niadtong niaging adlaw.

Ang biktima naila nga si Augusto Carillo, lumad nga taga New Lucena, Iloilo City samtang ang suspek giila nga usa ka Jo Ann Pahila, 38, lumad nga taga Buenavista, Guimaras. Ang duha temporaryo nga nagpuyo sa lugar samtang gipaayo ang barko nga ilang gisakyan ug gitrabahoan.

Matud ni PO1 Richie Gilleran, imbestigador sa Consolacion Police, nga ang bikitma nagtan-aw og TV dihang kalit giduol sa suspek ug gidunggab sa abaga ug kamot.

Daling girespon-dehan sa mga sakop sa Consolacion Police ang insidente hinungdan sa pagkasikop sa suspek sa ilang bunkhouse. (BANAT NEWS)