Ruby magdala og kusog nga uwan

CEBU, Philippines - Gibutang sa blue alert ang dakbayan sa Sugbo tungod sa gipaabot nga grabeng pagbunok sa uwan dala sa bagyong Ruby karong adlawa.

Ang Cebu City Disaster Risk Reduction Management Council pinangulohan ni Cebu City Councilor Dave Tumulak mimando usab sa pagpamutol sa mga sanga sa kahoy palibot sa Cebu City Hall nga peligrong mangabali tungod sa kusog nga hangin. Giawhag usab ni Tumulak nga mangandam sa pagbunok sa ulan tungod kay adunay laing Low Pressure Area nga nasigpatan.

Wa pay kamandoan si Mayor Michael Rama pag-evacuate sa mga molupyo sa coastal barangays kini bisan duna nay mga tawong buot nang mobakwit tungod sa kabalaka.

Aduna say “Libreng Tawag” nga ipakatap ang mga telecommunication companies sa mga merkado, plaza ug sa dalan Colon nga sugod karong adlawa.

Sa laing bahin, adunay 28 nga mga natanggong nga pasahero ang gipahiluna sa Unit 3 sa Carbon Public Market.

Masaligon si Ester Concha, ang pangulo sa Department of Social Welfare and Services (DSWS) nga dunay igong stocks sa relief goods nga mahatag  sa mga mahimong biktima sa bagyo. (Khacel Anne Sanchez ug Sheriza Mae Uy, USJ-R Intern/EIM)