Duna nay namakwit

CEBU, Philippines - Mga residente nga nahimutang sa danger zone ang pwersahon sa pagpabakwit matud sa hepe sa Provincial Disaster Risk Reduction Management Office (PDRRMO) nga si Baltazar Tribunalo.

Matud ni Tribunalo nga “preventive evacuation” ang ilang ipatuman aron walay mapiit sa peligro.

Matud ni Tribunalo nga nag-request usab sila og 51 ka satellite phones alang sa komunikasyon apan sa pagkakaron, handheld radios pa una ilang magamit.

Si Rose Jao, hepe sa provincial social welfare and development office (PSWDO) nagkanayon nga duna nay lima ka mga dump trucks nga giandam nga kargahan sa mga relief goods ngadto sa kalungsuran.

Si  Felix Suico nga maoy  Risk Reduction and Disaster Management Council (RDMC) officer  sa maong dakbayan miingon nga 110 ka lumolupyo sa Sitio Bohol-Bohol ug 320 usab ka lumolupyo sa Sitio Baybayon ; 75 usab gikan sa Sitio Paradise pulos sa Barangay Looc ang gipabakwit.

Ilaha karong giokupar ang mga lawak saringan sa Mandaue City Central School nga maoy nagsilbi nilang evacuation centers.

Samtang dunay mga residente sa kilid sa Mahiga Creek sa Sitio Mahusay sa Barangay Subangdaku  ang gihiklin una sa Subangdaku Elementary School.

Sa Toledo City, kapin sa 30 ka pamilya ang gipabakwit sa gipatumang preemptive evacuation.

Ang mga residente sa sityo Danawan ug lower Biga sa barangay Biga gipabakwit tungod sa risgo sa landslide. Matud ni Barangay Biga kapitan Pedro Sepada nga anaa na sa Biga Elementary school ang maong mga evacuees.

Samtang nagkanayon si SPO2 Marcel Ariesgado sa Tuburan Police Station nga aduna nay mga nibakwit sa maong lungsod apan padayon pang giihap kun pila ug kun asa gikan nga barangay ang mga pamilyang nibakwit. (Brenda D. Batuto, Romeo Limpangog ug Raymond Abarcas/EIM)(BANAT NEWS)