30 ka balay sa mahiga ugdaw

CEBU, Philippines - Naugdaw ang 30 ka balay nga nahimutang duol sa Mahiga Creek sa sitio Upper Mahusay, Subangdaku, dakbayan sa Mandaue sa sunog alas 3:10   kagahapon sa hapon.

Si Senior Fire Officer 1 Nilo Cosedo sa Bureau of Fire Protection (BFP) sa maong dakbayan miingon nga pulos ginama sa light materials ang mga panimalay nga nasunog hinungdan nga dali kini nilang gipaubos sa Task Force Alpha.

Nunot sa ilang pagpaubos sa TFA, dali usab nga mitabang sa pagpawong sa kayo ang mga bombero gikan sa dakbayan sa Sugbo ug mga sikbit nga mga dapit.

Matud ni SFO1 Cosedo nga ilang nakontrol ang kayo alas 3:38  ang takna sa hapon sa maong adlaw ug nagbilin kini og danyos nga mokabat sa P300 mil nga kantidad. Sa pasiuna nga pakisusi maoy ilang nahibaw-an nga ang kayo nagsugod sa panimalay nga gipuy-an sa usa ka Remedios Loquin ug gituohan nga  ang usa sa hinungdan ang ni-overheat nga electric fan.

Gitataw ni SFO1 Cosedo nga sa pag-ulbo sa kayo wala’y gikatahong naangol o kinabuhing nakalas. Si Roger Paller, public information officer sa dakbayan sa Mandaue, miingon nga ang mga biktima temporaryong gipahimutang sa covered court sa nahisgutang barangay.

Ang City Social Welfare Office ang mohatag sa makaon hangtud sa tulo ka adlaw. (BANAT NEWS)