Tulo ka bugaw, 6 ka babaye nasikop

CEBU, Philippines - Tulo ka bugaw ug unom ka babaye ang gipangsikop sa Fuente Police atol sa tulo ka operasyon sa managlahing lugar sa dakbayan sa Sugbo sa nakalabay nga kadlawon.

Matud ni Chief Insp. Wildemar Tiu, hepe sa Fuente Police Station, nga ila’ng gihimo ang maong operasyon gumikan sa ilegal nga kalihukan sa lugar.

Sa may dalan J. Llorente, usa ka bugaw nga naila nga si Frankie Basera, 34, taga Ermita Proper, human mitanyag og mga babaye sa tulo ka police decoy ug nangayo og bayad nga P500.

Apil sa nasikop ang duha ka babaye nga taga Proper Ermita gihapon.

Samtang sa laing operasyon sa dalan Juana Osmeña ug Ma. Cristina, duha sab ka bugaw nga babaye ug upat ka babaye ang nasikop sa lain nga grupo sa mga police decoy.

Ang duha ka bugaw giila nga sila si Mara Pilapil, 42, taga A. Lopez, Calamba ug Medrano Ligtas, 32, taga V. Rama, Calamba.

Matud ni Tiu nga nalooy siya sa kahimtang sa mga babaye human nasayri nga usa kanila may anak nga usa pa lang ka tuig ug may usa nga may pito ka anak. Apan gipasabot ni Tiu nga bisan unsaon supak sa balaud ang gihimo sa mga babaye ug ang kadelikado sa pagtakod sa sakit nga aids maoy usa sa gustong sumpoon sa kapolisan.

Usa sa gustong mahitabo ni Tiu nga dili maabusohan ang mga babaye pinaagi sa maong trabaho ug tagaan sila og panahon nga mangita og laing trabaho.

Gipasabot pa ni Tiu nga sa iyang pagka-polis kini pa ang unang higayun nga siya mihimo sa maong operasyon sanglit gusto siya nga limpyohan ang ilang lugar batok sa prostitusyon.

Ang mga nasikop nga bugaw pasakaan og kaso’ng human trafficking samtang ang unom ka babaye pasakaan og kasong prostitution. (BANAT NEWS)