2 dakpan, 2 sibat sa buy-bust
CEBU, Philippines - Wala’y swerte ang usa ka lalaki nga nataymingan sa mga nagpatrolyang kapolisan ug nasikop nga nipalit og drugas sa A. Lopez, Calamba, dakbayan sa Sugbo sa nakalabay nga buntag.
Giila ang nasikop nga si Rey Lopez, 44, minyo ug taga dalan Sto. Niño sa maong barangay.
Pinangulohan ni PO3 Ricafort Sucgang ug kaubanan ilang naaktohan nga dunay ka-transaksiyon ang dinakpan apan ang kauban nakasibat.
Nakuha sa kapolisan gikan sa posisyon ni Lopez ang duha ka medium size sa gituohang drugas.
Samtang sa lungsod sa Liloan, nakaeskapo ang usa ka notadong tigpayuhot og drugas apan sikop ang kauban niini atol sa buy-bust operation sa kapolisan pasado alas 6 sa gabii niadtong nakalabay nga adlaw. Ang nakaeskapo naila nga si Adriano Tundag samtang ang nasikop naila nga si Michael Pepito, taga barangay Lataban sa maong lungsod.
Matud ni PO3 Jason Gayo, desk officer sa Liloan Police, nga si Pepito ang gipatunol ni Tundag sa drugas atol sa pagpalit sa asset sa kapolisan daplin sa karsada.
Apan nakabantay si Tundag nga buy-bust ang maong hitabo ug dali kini nga nakasakay sa motorsiklo ug nakasibat biniyaan si Pepito.
Nakuha sa kapulisan gikan sa posisyon ni Pepito ang 10 ka gagmay nga pakete sa drugas ug ang marked money nga P200. (BANAT NEWS)
- Latest
