Polis gibanggaan sa babaye’ng hubog

CEBU, Philippines - Naangol ang usa ka polis human gibanggaan sa usa ka motorsiklo nga gimaneho sa babaye nga gituohang hubog atol sa checkpoint sa dalan Miñoza, Talamban, dakbayan sa Sugbo sa niaging kadlawon.

Ang drayber sa motorsiklo naila nga si Shiendy Rose Antolihao, 21, taga barangay Budlaan ning dakbayan.

Samtang ang polis nga naangol naila nga si PO1 Reovin Rota nga usa sa mga nagdumala sa checkpoint.

Matud ni PO2 Jud Jacquez sa Talamban Police nga dihang nakabantay si Antolihao nga dunay checkpoint, misuway kini og sibat ug iyang nabanggaan ang polis.

Bun-og sa wala nga bukton ug paa ang naangkon ni Rota ug gani nagisi pa ang uniporme niini.

Nasuta nga wala’y lisensiya si Antolihao nga gituohang maoy iyang gikahadlukan sa checkpoint.

Gumikan kay nanimaho og ilimno’ng makahubog si Antolihao, ila kini’ng gidala sa Cebu City Medical Center (CCMC) alang sa liquor test ug nasuta nga positibo.

Apan kagahapon sa hapon gitug-an ni Jacquez nga ila ra sab gibuhian ang babaye human nagkasinabot, nagpirmahanay og kasabutan tali sa polis.

Abagahon ni Antolihao ang bayad sa pagpatambal sa polis ingon man sa nagisi nga uniporme.

“Nakatulog gyod hinoon siya dri sa prisohan sir, pero nalooy na man gud ang kauban namo kay bata pa ni gipabayad na lang siya,” sigun pa ni Jacquez. (Jojo C. Ugdol/GMR)

Drugas nasakmit sa checkpoint, buy-bust

Tulo ang nadakpan sa checkpoint ug duha ang nadakpan sa buy-bust operation sa lungsod sa Consolacion ug nasakmitan og ilegal nga drugas.

Si PO3 Arthur Ariate sa Consolacion Police Station niila sa mga nadakpan nga sila si Andrew Dungog Agosto, 21, taga sitio Santo Rosario, Pulpogan ug Alfredo Algabre Ferrer, 27, taga sitio Lourdes, Jagobiao, dakbayan sa Mandaue.

Dugang nadakpan mao sila si Jushua Tejero Quiapo, 23, taga sitio San Roque, Lamac, Consolacion; Romel Lahoylahoy Galo, 22, ug Alvin Alpiso Pitogo, 24, nga nagpuyo sa maong dapit. Ang motorsiklo nga gisakyan nilang Agosto ug Ferrer gipahunong sa checkpoint sa kapolisan.

Namatikdan nga adunay gihagbong sa yuta nga plastic ug dihang gisusi sa kapolisan nasuta nga duha ka paketeng shabu hinungdan nga sila gidakop. Ang laing tulo nadakpan sa buy-bust operation batok sa suspek nga si Quiapo ug ilang nakuha ang usa ka paketeng shabu ug duha ka stick sa marijuana human ang ilang poseur buyer mibayad og P200 nga marked money.

Matud ni Ariate nga dihang ilang gidakop si Quiapo sulod sa payag nga gihimong hingusanan og marijuana, laing duha ang naghingos sa dinagkotan nga marijuana hinungdan nga lakip sa ilang gidakop. (BANAT NEWS)