Kanhi konsehal giambus

CEBU, Philippines - Patay ang kanhi konsehal sa Barangay Pilipog, Cordova human kini gitabangan og pusil sa duha ka gunman samtang naglakaw paingon sa ilang balay kagahapon sa hapon.

Ang biktima giila nga si Riel Inoc, 54, duna’y kapuyo ug nagpuyo sa Barangay Pilipog.

Si police investigator Erwin Gedorio sa Cordova Police Station nagkanayon nga ang biktima kauban ang iyang kapuyo nga si Perla Berdin gikan kini sa Argao nga mitambong og hearing sa kaso sa korte.

Wala hinuon mahibaw-i dayon kun unsa nga kaso ang ilang gitambongan ug mao kini ang gisusi pa sa mga polis.

Nasayran nga human sa hearing, sakay sa ilang sakyanan mihapit si Inoc sa Regional Trial Court sa dakbayan sa Lapu-Lapu kay matud may gikuha nga dokumento hinungdan nga miuna na lang og pauli ang iyang kapuyo.

Alas 2:45 sa hapon naabot sa ilang barangay ang biktima apan dihang naglakaw kini paingon sa ilang balay kalit lang nga gipusil si Inoc sa duha ka tawo ug naigo sa ulo ug ubang parti sa lawas hinungdan sa iyang kamatayon.

Human sa pagpamusil, dali ‘sab nga misakay ang duha ka gunman nga nagsul-ob og helmet ngadto sa usa ka motorsiklo.

Nakuha sa kapolisan didto sa crime scene ang unom ka bala sa .45 kaliber nga pistola ug gihulagway ni PO3 Gedorio nga tuyo gayud sa duha ka gunman nga dili buhion ang kanhi konsehal.

Usa sa gisubay karon sa kapolisan nga ilang masayran kun unsa nga kaso ug unsa nga hearing ang gitambongan ni Inoc didto sa Argao sa pamasin nga kini makatabang sa pagsulbad sa kaso.

Sumala pa ni PO3 Gedorio nga naglisod pa sila og hinabi sa kapuyo sa biktima kay nagsige na lang kini og hilak. Nagduda ‘sab ang kapolisan nga posible’ng gisundan sa mga gunman ang biktima ug hangtud nga kini naabot sa ilang lugar.

Gitug-an ni PO3 Gedorio nga ang biktima diay maoy tigproseso sa mga gusto’ng duna’y ipangbaligya nga yuta busa apil kini sa anggulo nga ilang gitan-aw karon, apan wala usab nila gipadaplin ang rason nga bikil ang motibo sa pagpatay.

Gipasabot ni PO3 Gedorio nga human napupos ang termino ni Inoc isip konsehal sa Barangay Pilipog wala na ‘sab kini midagan og lain nga posisyon. (BANAT NEWS)