LCPO nangandam sa Pasko

CEBU, Philippines – Subsob ang gihimong pagpangandam sa kapolisan sa dakbayan sa Lapu-Lapu niining nagsingabot nga Pasko kanus-a mopahimulos usab sa higayon ang mga badlungon sa katilingban pinaagi sa paghimo og mga krimen sama sa lungkab, kawat ug pagpanulis.

Si Senior Superintendent Armando Radoc, direktor sa Lapu-Lapu City Police Office (LCPO), miingon nga sa dili pa ang Pasko ila’ng hingusgan ang kampanya batok sa mga dautang elemento pinaagi sa all-out foot patrol sa kabarangayan diin kusog ang krimen.

Subsob usab ang ilang gihimong check point ug security operation tungod kay sila nagtuo nga sa panahon sa “ber months” mokusog gyud ang krimen.

Gidugang ni Radoc nga ang kapolisan wala’y Christmas break hinungdan nga daghang polis ang ipakatap dungan sa paghangyo sa publiko nga kun dunay mamatikdan nga mga kadudahang lihok i-report dayun sa ilang buhatan.

Mosusi usab ang kapolisan sa mga tindahan og pabuto aron maseguro nga wala’y mga gidili nga mga pabuto nga ibaligya sa kadalanan.

Si Lapu-Lapu City Mayor Paz Radaza sa iyang bahin miingon nga iya’ng gimandoan ang kapolisan nga kinahanglan i-monitor gyud ang distansya sa pagbaligya og mga pabuto aron malikayan ang bisan unsa’ng disgrasya. – /GMR) (BANAT NEWS)