Bala sa firing nilapos sa construction site

CEBU, Philippines – Nidangop sa Cebu City Police Office ang usa ka construction engineer human ang bala gikan sa nag-firing nga polis nilusot ug nakaigo sa sapatos sa iyang trabahante kagahapong adlawa.

Matud ni Engr. Restetuto Lao nga maayo na lang kay nakasuot og sapatos nga “steel toe” ang iyang sakop ug wala nakadulot ang bala sa iyang sapatos ug didto kini nibanda sa yuta.

Atol sa pagbisita ni Lao gidala sab niini ang usa ka slug sa bala nga giingong gikan sa nag-firing sa likod ra sa lugar diin duna sila’y gitrabaho nga usa ka building.

Gusto ni Lao nga hangyoon ang hepe sa CCPO nga undangon ang pag-firing sa mga polis sa ilang firing range hangtod nga maseguro nga dili na kini mahitabo pa og balik.

Gitug-an ni Lao nga dili kini ang unang higayun nga nahitabo nga dunay bala nga nilapos sa ilang gitrabahoan diin matud pa upat ka buwan na ang nakalabay duna sa’y bala nga niigo sa LPG nga ilang gimontar apan swerte lang kay wala pa’y sulod ang mga LPG. Ang deputy chief sa CCPO, Supt. Alet Virtucio, miingon nga hatagan nila og pagtagad ang insidente. Gipasabot ni Virtucio nga dunay practice firing ang kapolisan sa lugar kay duna kini’y salmutan nga kompetisyon sa umaabot nga mga adlaw. Apan siya miingon nga dili sila magpanuko   pagpaundang sa firing kung masuta ang maong bala gikan sa kapolisan.

Usa sa gustong subayon ni Virtucio ang posibilidad nga gikan sa lain nga armas ang maong bala ug ang mga polis lang ang gidudahan kay mao’y naa sa duol nga nagpabuto.

“Madali lang yan, i-check natin yan mabilang naming ma-identify who are those involved na nag-tatarget practice tapos i-compare natin yung bala galing dun, malaman natin from where firearms it came from kung saan pinutok. Kung sa amin galing yun, pwede nating pagbigyan ititigil natin yun,” sigun ni Virtucio. – /GMR) (BANAT NEWS)