Bagyong Ruby gipangandaman

CEBU, Philippines – Giuswag sunod buwan ang Provincial Sports and Cultural Festival gumikan sa bagyong Ruby.

Ang kalihukan ipahigayun unta karong Disyembre 5 hangtud 10 apan giuswag kini ngadto sa Enero 5 hangtud 10, 2015 sa lungsod sa Argao ug Dalaguete nga bag-ohay lang naigo sa bagyong Queenie.

Ang hepe sa Provincial Disaster Risk Reduction Management Office (PDRRMO) nga si Baltazar Tribunalo nagkanayon nga si Gobernador Hilario Davide III ang nimando sa pag-uswag sa kalihukan.

Matud ni Tribunalo nga base sa report sa Western International Early Warning Office, ang bagyong Ruby posible kini’ng moagi sa naagian sa bagyong Yolanda.

Apan siya nagkanayon dili angayan maratol ug kinahanglan nga kanunay nga andam aron malikayan ang disgrasya.

Kagahapon sa hapon si Hagupit (international name) nabantayan kining nahimutang sa 2,325 kilometros sa sidlakang Mindanao.

Ang bagyo gibana-banang dunay gikusgon nga 75 kilometro matag takna duol sa sentro niini ug gibana-banang dunay gikusgon nga 90 kph ang unos ug moirog sa kasadpan habagatang kasadpan sa gikusgon nga 35 kph. Si Hagupit gibana-banang mosulod sa nasud karong Huwebes sa hapon ug tawgon kini og “Ruby”.

Ang maong bagyo gibana-banang mo-landfall sa sidlakang bahin sa Kabisay-an ug mokuso-kuso sa nasud apan posibleng moliko kini ngadto sa habagatang bahin sa Japan.

Sa dili pa kini mo-landfall ang Ruby gibana-banang dunay gikusgon sa hangin nga 150 kph ngadto sa 175 kph ug magdala kini og kasarangan ngadto sa kusog nga pag-uwan sa mga lugar nga iyang maagian ug posibleng dunay mahitabong storm surge.  Sa iyang bahin, si Lapu-Lapu City Mayor Paz Radaza nipahimangno sa iyang mga sakop nga mangandam sa bagyo ilabi na sa mga anaa sa danger zone areas aron malikayan ang disgrasya.

Dugang ni Radaza nga duna na sila’y mga evacuation centers ug ang DSWD andam sa paghatag og mga relief goods alang niadtong  mga residente nga ihiklin. Gipaabot nga sa buwan sa Disyembre duha pa ka bagyo ang posibleng mosulod sa Pilipinas. – /GMR) (BANAT NEWS)