Manag-inahang pushers sikop

CEBU, Philippines – Mokabat sa P258, 420 nga kantidad sa drugas ang nasakmit sa mga sakop sa Provincial Intelligence Branch (PIB) sa Cebu Provincial Police Office (CPPO) gikan sa inahan ug anak niini nga lalaki atol sa usa ka buy-bust operation sa mga awtoridad didto sa QCRO, DAS, dakbayan sa Toledo.

Ang target sa kapulisan mao si Christopher Olimba, 35, apan apil sa gidakop ang inahan niini nga si Florencia Olimba, 52.

Matud pa ni Senior Inspector Armando Labora ang deputy chief sa PIB nga nahinabi sa Banat News kini miingon nga mismo ang inahan nga si Florencia ang mitunol sa usa ka pakete sa drugas sa asset sa kapulisan sa dihang gihimo ang test buy.

“Wala mi nagtoo nga iya diay ‘tong mama, abi namo og tawo lang ni Christopher, pagdinakopay na nahibaw-an namo nga iya diay nga inahan,” sigun pa ni Labora.

Sumala pa ni Labora nga halos duha ‘sab ka semana ila nga gipaubos sa surveillance si Christopher human sila nakadawat og impormasyon gikan sa concerned citizen may labot sa ilegal nga negosyo sa naulahi.

Nakuha sa kapulisan ang upat ka dagko nga putos sa gituohang shabu, usa ka medium ug usa ka gamay nga pakete.

Atol sa pagsikop sa kapulisan misulay pa og sukol ug misibat si Christopher apan napugngan kini. Sigun pa ni Labora nga gikan sa dakbayan sa Sugbo ang supply sa drugas sa manag-inahan.

Karong adlawa gikatakdang pasakaan og kaso sa pagpamaligya og drugas ang inahan ug anak nga gitanggong na sa karsel sa Consolacion Police Station. – /EIM) (BANAT NEWS)