Naghikog tungod sa P10
CEBU, Philippines - Usa ka lalaki ang naghikog tungod sa panaglalis nilang duha sa iyang kapuyo tungod lang sa P10 diha sa lungsod sa Sibonga, samtang laing usa usab ang nagdunggab sa iyang tiyan sud sa iyang balay sa dakbayan sa Lapu-Lapu.
Patay na nga nagbitay sa punoan sa sinigwelas ang usa ka 25- anyos nga lalaki human kini naghikog kay nangluod human nga nagkalalis ug iyang kapuyo gumikan lang sa 10 pesos diha sa Sitio Mangga, Barangay Bahay sa Sibonga.
Ang naghikog naila nga si Exequiel Angelus Nudalo, mamintalay og sakyanan ug nagpuyo sa maong lugar. Matud pa ni Police Officer 2 Ederlino Bacusmo, ang imbestigador sa Sibonga Police Station nga nahinabi sa Banat News migamit og electrical cord si Nudalo nga gihikot niini sa iyang liog ngadto sa sanga sa sinigwelas aron sa paghikog.
Sumala pa ni Bacusmo, gikatahong nagkalalis si Nudalo ug kapuyo niini nga si Irene Tamang sa dihang padung na untang motrabaho sa siyudad sa Sugbo ang lalaki.
Sigun pa ni Bacusmo nga gusto sa lalaki nga maglakaw lang aron sila makahapit sa merkado apan ang kapuyo niini gusto nga mosakay og traysikad kay daghang iro sa dalan ug gitunolan ang babaye og P10 sa inahan niini aron pamelete.
Sumala pa ni Bacusmo nga daw nainsulto si Nudalo maong nag-away na hinuon ang duha ug wala modayon og lakaw sa trabahoan.
Human sa lalis gikatahong milakaw si Nudalo sa balay ug nianang pagkabuntag nadiskubrehan na lang nga nagbitay na kini. (BANAT NEWS)
- Latest
