Ordinansa sa tambutso patun-an pag-usab

CEBU, Philippines - Patun-an pagbalik ni Cebu City Mayor Michael Rama ang Anti-Muffler Modification Ordinance nga gipangamahanan ni Konsehal Roberto Cabarubbias.

Kini human ningreklamo ang Motorcycle Rights Organization, pundok sa mga drayber og motorsiklo, nga gipangulohan ni Marjun Tacder.

Usa sa gikwestiyon ang curfew hours gikan sa alas 7 sa gabii hangtud alas 5 sa buntag.

Buot sa grupo nga alas 10 na magsugod sanglit ang alas 7 sa gabii “rush hour” pa. Gikwestyon usab kung apil ba sa lagda ang mga tambutso sa motorsiklo nga may gikusgon nga lapas sa 84db apan dili modified sama sa big bikes nga Harley Davidson.

Ang ordinansa nagmando sa 84db nga limit nga mas ubos sa gilagda sa Land Transportation Office nga 115db. Sugyot sa grupo nga ang matag law enforcer adunay instrumento nga mosukod sa gikusgon aron malikayan nga magamit kini sa ilegal nga pagdakop. Ikaduha mao nga ang lugar kung asa i-test ang mga tambutso kinahanglan nga hilum.

Ikatulo mao nga ipa-implementar ang ordinansa alang sa tanan ug dili lang alang sa mga pinili nga mga motorsiklo ug scooters. Giklaro ni Tacder nga uyon sila sa maong ordinansa apan nanginahanglan sila og katin-awan mahitungod niini. (BANAT NEWS)