Gi-hostage ang mga ugangan

CEBU, Philippines - Nagtingkagol sa Carbon Police Station ang usa ka lalaki nga mi-hostage sa iyang mga ugangan pasado alas 6:00 sa dalan Panganiban ug Colon ning dakbayan sa Sugbo kagabii.

Ang nasikop naila nga si  Junnie Largo, 32, nga gibalhog na karon sa prisohan human nga iyang gitionan og kalibre .38 nga revolver ang iyang mga ugangan nga sila si Elina, 57 ug Marcelito Matus, 62.

Si Senior Police Officer 1 Artemio Tumakay, team leader sa misikop kaniya nga nahinabi  sa Banat News miingon nga pasado alas 6:00 nakadawat sila og tawag nga dunay usa ka lalaki nga nagdala og armas sa maong dapit.

Sa ilang pagsusi sa maong taho ilang nakit-an sulod sa balay ang suspek nga nagdala og armas nga nagtion sa iyang revolver ngadto sa iyang mga ugangan.

Wa makabantay ang suspek sa pag-abot sa kapolisan kay nagtalikod ug diretsong gihamagan sa mga polis hinungdan sa pag -inilogay nila sa armas hangtud nga nadis-armahan kini.

Matud pa ni Tumakay nga sa wala pa mahitabo ang pagpang-hostage nagkalalis ang suspek ug ang iyang asawa apan mikuha og armas ang suspek ug gidid-an ang si bisan kinsa sa sud sa balay nga makagawas kung di sila gustong pamusilon.

Apan dunay usa ka concerned citizen nga nakamatikod dayon ug mitawag sa mga polis hinungdan sa pagkasikop niini. (BANAT NEWS)