Pangandam sa kalamidad kuwang pa

CEBU, Philippines – Kuwang pa gihapon ang pagpangandam sa mga lokal nga kagamhanan batok sa unsa nga kalamidad nga muabot. Matud pa ni Gob. Hilario Davide III nga ang matag kalamidad nga muabot maghatag og leksiyon aron mapalambo pa ang pagpangandam.

Sa niaging semana, gikuso-kuso sa bagyong Queenie ang habagatang bahin sa Sugbo.

Tungod sa lapad nga uwan, ubay-ubay nga kabalayan ang nasanapan sa tubig ug tulo ka balay ang nabanlas sa baha sa lungsod sa Malabuyoc ug mikalas usab sa kinabuhi sa usa ka 50-anyos nga si Alona Baldado. Ang hepe sa Cebu Provincial Disaster Risk Reduction and Management Office (CPDRRMO), Baltazar Tribunalo, nasagmuyo sa maong hitabo. Matud ni Tribunalo nga kung ang lokal nga kagamhanan nipatuman pa og “forced evacuation” sa mga residente nga nagpuyo duol sa sapa, malikayan unta ang maong insidente.

Ang mga opisyal sa barangay Poblacion 1 giingong wala kaayo mangandam sa pag-abot sa bagyo. Matud ni Davide nga ang habagatang bahin sa Sugbo ubos lang sa signal #1 ug wala’y nagdahum nga grabe ang himuong kadaut sa bagyo.

Si Davide nagkanayon nga ang bagyo naghatag og leksiyon nga importante nga ang lokal nga kagamhanan kanunay nga andam ilabi na ang mga opisyal sa lungsod ug kabarangayan kinsa maoy mga first responder kung dunay mga katalagman.

Hinuon ang gobernador misalig sa mga mayor sa kalungsuran nga mihan-ay na sa ilang Disaster Risk Reduction and Management (DRRM) Program.

Giklaro ni Davide nga ang papel sa probinsiya mao ang pag-abag sa kalungsuran.

Subay niini, si Davide miawhag sa hunta probinsiyal sa pagpalabang og resolusyon nga magdeklarar nga ubos sa state of calamity sa mga apektadong lugar sa bagyong Queenie aron magamit ang nahabilin nga calamity fund karong tuiga.

Ang Kapitolyo aduna pa’y P121 milyones nga pundo sa calamity fund diin 30 porsiyento o P40 milyones sa maong pundo ang gigahin ngadto sa quick response operation. – /GMR) (BANAT NEWS)