Anti-trafficking gihingusgan sa mga lugar nga gibagyo

CEBU, Philippines – Gipatuman sa International Organization for Migration (IOM) ang ilang proyekto batok sa human trafficking sa mga lugar nga naapektohan sa bagyong Yolanda.

Si Romena “Beng” Sta. Clara, national gender focal person, nagkanayun nga ang ilang kalihukan ubos sa koordinasyon sa Department of Social Welfare and Development (DSWD), Inter-Agency Council Against Trafficking (IACAT); lokal, probinsiyal ug nasudnong kagamhanan, ug non-government organization (NGO).

Matud niya nga ang nahisgutang mga ahensiya nagtinabangay sa pagpakigbatok ug pag-monitor sa human trafficking sa mga lugar sa Sugbo, Ormoc, Western Leyte, Biliran ug Tacloban nga grabeng naapektohan sa bagyong Yolanda.

Usa sa ilang gibuhat batok sa human trafficking mao ang paghatag og mga impormasyon ngadto sa publiko pinaagi sa pagbutang og mga tarpaulins diha sa help desk sa publikong lugar sama sa mga terminals ug pantalan.

Matud ni Sta. Clara nga mohatag usab sila og tabang sa mga nabiktima sa human trafficking.

Usa sa gihimo sa ilang grupo karon mao ang pagpahigayun og research kabahin sa gidaghanon sa mga tawo nga nabiktima sa human trafficking gikan sa mga lugar nga naapektohan sa bagyong Yolanda.

Gipasabot ni Sta. Clara nga ang human trafficking dili lang kini pagbiyahe ngadto sa laing lugar sa usa ka biktima aron himuong ulipon.

Matawag usab nga human trafficking ang pagtrabaho sa biktima nga supak sa iyang kabubut-on bisan og naa siya sa ilang lugar ug ang makabenepisyo niini ang laing tawo.

Matud ni Sta. Clara nga ubos na karon sa expanded law ang human trafficking tungod kay mi-adopt na sila sa Palermo Protocol o sa international definition sa human trafficking.

Ang mga residente sa lugar nga naigo og katalagman maoy kasagarang mabiktima sa human trafficking tungod kay dali kini’ng motuo kun dunay mga tawo nga magpasalig kanila nga makabaton og maayong panginabuhi aron mahaw-as sa kalisud ilabi na kadtong mga tawo nga nabuwag o nawagtangan sa ilang mahal sa kinabuhi.

Dili usab malikayan nga ang mga residente sa lugar nga naapektohan sa katalagman mangandoy kini’ng muadto sa laing lugar aron makakita og maayong panginabuhian ug pahimuslan usab kini sa uban. – /GMR) (BANAT NEWS)