Napusilan sa polis
CEBU, Philippines – Usa ang angol ug duha ang nasikop human gisuwayan pagpusil sa mga batan-on ang nag-roving nga mga sakop sa Mabolo Police Station sa sudlonon nga bahin sa Barangay Mabolo ning dakbayan sa Sugbo.
Ang napusilan sa kapulisan naila nga si Victoriano Sabejon, 22, alyas JR Negro, taga Sitio Mahiga Creek samtang ang mga nasikop mao sila si Chrismel Macdasal, 21, taga Holy Name, Richard Quimaco, 25, taga Cabahug Street pulos sa Barangay Mabolo.
Matud pa ni Senior Police Officer 1 Rommel Bancog sa Homicide Section sa Cebu City Police Office (CCPO) nga nahinabi sa Banat News nga nag-roving sila si PO3 Rodel Abejuela, PO3 Douglas Dela Peña, PO1 Christopher Cuizon ug PO1 Rayme Veraque ug ilang nalabyan ang usa ka payag diin nagpundo ang mga suspetsado.
Ang mga pulis pulos nakasibilyan niadtong tungora ug giingong kalit lang gisinggitan ni Sabejon sa pag-ingon: “Hoy, asa mo?”
Si PO1 Cuizon mibalik sa agi aron duolon si Sabejon apan nabantayan niya nga duna kini gikuptang armas maong nagpaila siya dayon nga polis sa Mabolo ug gimandoan pag-isa sa iyang kamot ug t-shirt. Imbes motahod, giingong gition ni Sabejon ang armas hinungdan nga giunhan kini sa pagpusil ug naigo sa dughan. Dali siyang gidala sa Vicente Sotto Memorial Medical Center (VSMMC).
Nakuha sa kapulisan gikan sa lugar ang usa ka .22 revolver nga duna’y pito ka bala, usa ka improvised shotgun, duha ka kutsilyo, duha ka cellphone, usa ka gunting ug usa ka pakete sa gituohang shabu.
Samtang ang mga kauban ni Sabejon nga si Macdasal nakuhaan og mga drug paraphernalia samtang si Quimaco nakuhaan og duha gihapon ka pakete sa gituohang drugas.
Si Sabejon matud pa notado na sa illegal drugs diha sa maong dapit nga gidasunan usab ni SPO1 Bancog base sa pamahayag sa kapuyo sa suspek. “Ingon ang iyang ka live-in nga pusher daw si JR Negro,” sigun pa ni Bancog. – /EIM) (BANAT NEWS)
- Latest
