Tulisan nasikop

CEBU, Philippines -  Nalipay na unta ang usa ka suspetsado’ng tulisan human niya makuha ang mahalon nga smart phone sa usa ka lalaki nga iyang gitulis sa jeep apan wala kini suwerte kay nadakpan siya sa polis nga diha ra diay sa duol.

Ang pagpanulis nahitabo kaniadto’ng Biyernes sa hapon didto sa Barangay San Roque (Ciudad), dakbayan sa Sugbo.

Ang nasikop mao si Edgar Aguilar, 50, molupyo sa San Sebastian, Borbon kinsa giila g’yud sa biktima nga si Charles Chamberlaine Igot, 21, nga maoy mikuha sa iyang cellphone.

Base sa imbestigasyon sa kapolisan nahibaw-an nga ang biktima nagsakay og PUJ nga rota og 02B apan pag-abot sa jeep sa Arellano Boulevard duol sa barangay hall gikuot sa suspek ang cellphone sa biktima sulod sa iyang short pants.

Diha’ng nakabantay ang biktima, nag-inilogay sila’ng duha sa cellphone apan tungod kay nalupig sa kusog ang biktima nakuha g’yud ni Aguilar ang cellphone.

Abtik ang tulisan nga midagan human miambak gikan sa PUJ apan nakit-an siya sa mga polis nga sakop sa Parian Police Station nga nagpatrolya mao nga siya nadakpan ni PO2 Nicasio Undalok ug kaubanan.

Narekober sa kapolisan ang Samsung Galaxy S5 gikan sa suspek ug dali siya nga gitanggong sa Parian Police Station.  (BANAT NEWS)