10 drug suspects nadakpan

CEBU, Philippines - Napulo ka mga drug suspects ang nasikop sa managlahing anti-illegal drugs operations sa kapolisan sa lalawigan sa Sugbo.

Nadakpan sa buy- bust operation si Redentor “Palos” Rosalejos, 25, taga Gairan, Bogo City ug ang kauban niining si alyas Robocop, 17, nga taga San Vicente.

Narekober sa kapolisan gikan ni Rosalejos ang upat ka pakete nga shabu ug P1,000 nga halin sa gidudahang drugas ingon man ang iyang motor samtang  nakuhaan si Robocop og usa ka paketeng shabu, usa ka kalibre .45 nga pistola ug ang P200 nga buy-bust money ug motorsiklo niini.

Sa lungsod sa Santander, usa ka buy- bust operation ang gilusad sa barangay Talisay nga miresulta sa pagkasikop ni Angelo Catipay, 24, nga naa na sa watchlist sa kapolisan sa maong lungsod.

Gidakop siya human nga iyang gibaligyaan og shabu nga bali’g P500 ang usa ka polis nga poseur buyer.

Samtang nakaeskapo sa buy-bust operation sa kapolisan ang target nga gipasanginlang drug pusher nga si Dante Catam-isan Maglinte sa Barangay Maghawak, lungsod sa Medellin.

Nadakpan hinuon iyang mga kauban nga sila si Jerome  Flores alyas Jojo, 27, ug Ronald  Ponce alyas Dodong,19.

Si Flores nakuhaan og duha ka paketeng shabu ug laing duha usab ka paketeng shabu uban sa P300 nga marked money nga ilang nakuha gikan kang Ponce.

Samtang 29 ka paketeng gituohang shabu ang nasakmit sa kapolisan gikan sa lima ka lalaki nga nadakpan sa Gun-ob Police Station sa dakbayan sa Lapu-Lapu.

Ang nadakpan mao si Kevin Tampus, 20,  Niño Yara, 18, Japeth Jumanguin, 23, ug si Ario Ambol, 30, pulos mga residente sa maong barangay.

Laing gidakop mao si Jomar Baguio, 21, usa ka trisikad driver ug residente sa Sudtunggan, Barangay Basak.

Ang lima nadakpan sa grupo ni Senior Inspector Wilbert Parilla didto sa Purok Balanghoy nga ang target mao si Tampus.   (BANAT NEWS)