Di storm surge ang miigo sa Argao
CEBU, Philippines - Giklaro ni Engr. Al Quiblat, OIC sa Philippine Atmospheric Geophysical and Astronomical Services Administration (PAGASA) sa Mactan nga di storm surge ang nahitabo sa barangay Langtad sa Argao atol sa pag-igo sa bagyong Queenie.
Gikatahong ang pagsaka sa tubig sa maong barangay gitawag og “wind raven wave.”
Si Quiblat mipasabot nga ang storm surge o ang abnormal nga pagsaka sa tubig mamugna lamang kun ang kategoriya o gikusgon sa bagyo anaa sa level nga 118 kilometros kada oras.
Dugang pa ni Quiblat nga wala sila moisyu og storm surge warning niadtong Huwebes kay anaa ra man ang gikusgon sa bagyo sa 55 kph.
Sa pagkakaron adunay nasigpatan nga Low Pressure Area sud sa Philippine Area of Responsibility(PAR) nga adunay gilay-on nga 1000 kilometers sa East sa Mindanao.
Apan ang PAGASA miingon nga minus na ang tsansa niini nga mahimo kini nga bagyo o kun mahimo man gani kini, panganlan kini og Ruby.(Decemay P. Padilla/EIM)(BANAT NEWS)
- Latest
