Bantay sa peke nga kwarta
CEBU, Philippines - Nipahimangno ang kapolisan sa dakbayan sa Talisay nga magbantay sa mga peke nga kwarta ilabi na nga nagsingabot ang Pasko.
Ang pahimangno giluwatan human gi-turnover ngadto sa Talisay Police Station ang gituohang peke nga kwarta nga mokabat sa P11 mil nga pulos tag usa ka libo ug 500 pesos.
Si Superintendent Reycel Carmelo Dayon, hepe sa Talisay City Police, miingon nga dunay posibilidad nga mukatap ang mga peke nga kwarta panahon sa Pasko ug Bag-ong Tuig.
Ang igsuon ni Konsehal Richard Francis “Choy” Aznar ang mi-turnover sa mga peke nga kwarta tungod sa iyang pagduda.
Gipasabot ni Dayon nga dili pa nila masikop ang tawo nga nagbayad sa kwarta tungod kay dili pa sila kasulti nga kini peke. Apan usa sa nabantayan sa opisyal sa maong kwarta mao nga pareho lang ang serial number ug klaro usab ang kolor sa kwarta.
Ang kapolisan sa Talisay mopasusi sa maong kwarta ngadto sa Central Bank aron pagtino kun peke ba o dili. (Decemay P. Padilla/GMR)(BANAT NEWS)
- Latest
