Koreyanong way ibayad sa abang natagak sa 8th floor

CEBU, Philippines - Usa ka Koreano ang nalandig sa tambalanan human kini nahagbong gikan sa ika-walo nga andana ug swerteng nasangit sa kable sa kuryente ayha pa natagak sa yuta diha sa La Guardia Flats, La Guardia Street, Barangay Apas ning dakbayan sa Sugbo.

Ang langyaw naila nga si Kang Sung-Hwi, 46, temporaryo nga nagpuyo sa maong dapit apan lumad nga taga Hyosung, Korea.

Matud pa ni Senior Police Officer 1 Rommel Bangcog sa Homicide Section sa Cebu City Police Office nga nahinabi sa Banat News, base sa ilang imbestigasyon misulay gayod og hikog pinaagi sa paglaslas sa pulso si Kang.

Giingong naproblema kini nga wala na siya’y kwarta nga ikabayad sa iyang abang sa iyang condominium.

Ang maong impormasyon ‘sab gikompirma sa maong langyaw nga nahinabi sa kapulisan.

Niadtong adlaw nga Martes unang gibisita sa tag-iya sa maong condominium si Kang aron paninglan sa abang apan wala kini ikabayad hinungdan nga kini wala na nangabli sigun pa sa building officer nga si Mae Canoy. Sigun pa ni Bangcog nga human naglaslas sa pulso si Kang mipaingon kini sa terrace hangtod nga nalipong ug nahagbong.

Nasayran nga atol sa pagkahitabo nakainom si Kang. “Basin og gisakitan ‘to siya paglaslas unya pag-adto niya sa terrace nalipong dala kahubog unya nahulog,” sigun pa ni Bangcog.

Gipadaplin na ‘sab hinoon sa kapulisan ang posibilidad nga duna’y laing tawo nga mipasipala kaniya human nga gitug-an ni Kang ang tanan nga hitabo. Hangtod karon nagpaalim pa sulod sa pribadong tambalanan si Kang. (BANAT NEWS)