Maayong pagkaon lang atol sa Pasko

CEBU, Philippines - Nipahimango ang Provincial Health Office sa Sugbo sa publiko labot sa maayong andamon nga pagkaon ug unsaon paglikay sa disgrasya atol sa Pasko ug Bag-ong Tuig.

Matud ni Dr. Cynthia Genosolango, kasamtangang hepe sa PHO, nga minus-minusan ang pagkaon nga naglabi ang mantika, parat ug tam-is aron paglikay sa kadaut sa panglawas. Dili angayan kan-on ang maong mga pagkaon sa mga tawo nga may sakit nga high blood, diabetic, gastritis ug uban pa.

Giklaro usab ni Genosolango nga ang PHO nakig-alayon sa mga mo-inspeksyon sa mga karne aron pagseguro nga wala’y mabaligya sa merkado nga double dead.

"We have sanitary inspectors distributed all over the province working in our municipal, city or LGUs, working also for the same job kini aron masegurado ang seguridad sa katawhan," asoy ni Genosolango.

Mensahe niya sa publiko nga dili magpataka og kaon aron malikayan ang disgrasya sa holiday season. (BANAT NEWS)