Mga doktor sa VSMMC giimbestigar

CEBU, Philippines - Giimbestigar sa kadagkoan sa Vicente Sotto Memorial Medical Center ang pito ka doktor kinsa gireklamo sa kamatay0n sa 7-anyos nga bata.

Ang pamilyang Rocina nipadayag sa ilang kalagot batok sa mga doktor sa Facebook human sa pagkamatay sa bata nga si Jezniel.

Matud ni Dr. Ramon Najarro, pangulo sa Pediatric Ward nga nadawat nila ang pormal nga reklamo batok sa mga doktor.

Lakip sa ilang gisusi ang mga nurse nga ni-atiman ug nihatag sa mga gikinahanglang tambal.

Gihimakak sa tambalanan ang unang reklamo sa tagtungod nga wala sila tagda ug atimana sa tambalanan hinungdan nga namatay ang bata.

Gitug-an ni Najarro nga base sa reklamo, gikwestyon sa pamilya ang pamaagi sa pag-atiman ug pagtagad sa mga medical staff ug di ang ilang katakus.

Hinungdan nga ilang gisusi kun kinsa ang mga doktor ug nurse ang nakahatag og serbisyo ngadto sa pasyente.

Gipasabot usab sa doktor nga wala masuta kun unsa’y sakit sa bata kay nagnegatibo kini sa tanang gipahigayong test.

Base sa death certificate ni Jezneil nga sepsis ang namatyan niini ug gipaabot ni Najarro nga septic shock ang namatyan kon ang wala na’y saktong flow sa dugo ug oxygen tungod sa infection.

Bukas ang komunikasyon sa tambalanan ug pamilya aron makab-ot ang tinuoray nga nahitabo sa kamatayon sa bata. (BANAT NEWS)